ایران کا آبنائے ہرمز میں نیا کنٹرول زون قائم، بحری جہازوں کیلئے پیشگی اجازت لازمی قرار

ایران نے آبنائے ہرمز میں اپنی نگرانی مزید سخت کرتے ہوئے ایک نیا کنٹرولڈ میری ٹائم زون قائم کرنے کا اعلان کیا ہے، جس کے تحت اس حساس آبی راستے سے گزرنے والے تمام بحری جہازوں کیلئے پیشگی اجازت حاصل کرنا لازمی قرار دے دیا گیا ہے۔

ایران کی خلیج فارس اسٹریٹ اتھارٹی کے مطابق آبنائے ہرمز میں باقاعدہ کنٹرول زون قائم کر دیا گیا ہے اور اس حوالے سے تفصیلات سماجی رابطے کے پلیٹ فارم پر جاری کی گئی ہیں۔

بیان میں کہا گیا ہے کہ فجیرہ سے قشم جزیرے تک سمندری حدود کی نئی لائن مقرر کی گئی ہے، جس کے بعد اس علاقے سے کسی بھی بحری آمدورفت کیلئے اتھارٹی سے رابطہ اور اجازت ضروری ہوگی۔

یہ اقدام دنیا کی اہم ترین بحری تجارتی گزرگاہ پر ایران کے بڑھتے ہوئے کنٹرول کی نشاندہی کرتا ہے۔