مملکت کی سیکیورٹی اور تحفظ کے لیے کسی بھی اقدام سے دریغ نہیں کریں گے:سعودی کابینہ

سعودی کابینہ نے شاہ سلمان بن عبدالعزیز کی زیر صدارت منعقدہ اجلاس میں اس عزم کا اعادہ کیا ہے کہ مملکت سعودی عرب اپنی سلامتی کے تحفظ، استحکام کے تسلسل اور شہریوں و مقیم افراد کی حفاظت کے لیے کسی بھی اقدام سے گریز نہیں کرے گی۔

اجلاس میں کابینہ نے وطن کے دفاع اور اس کے اثاثوں و صلاحیتوں کے تحفظ میں مسلح افواج کی اعلیٰ کارکردگی کو سراہا۔

اجلاس کے آغاز میں رواں سال 1447 ہجری کے حج سیزن کے لیے تیار کیے گئے منصوبوں پر عمل درآمد کا جائزہ لیا گیا۔ اس کے ساتھ ساتھ ضیوف الرحمن پروگرام کے تحت مختلف اداروں کے درمیان تعاون اور ہم آہنگی کے نتائج کا بھی تفصیلی جائزہ لیا گیا۔

کابینہ نے مکہ مکرمہ، مشاعر مقدسہ اور مدینہ منورہ میں حجاج کرام کو فراہم کی جانے والی خدمات کے معیار میں بہتری اور انسانی، تکنیکی و انتظامی وسائل کے مؤثر استعمال پر زور دیا تاکہ حج انتظامات کو مزید بہتر بنایا جا سکے۔

مزید کہا گیا کہ مسلسل آٹھویں سال “مکہ روٹ” اقدام جاری ہے، جس سے اب تک بارہ لاکھ سے زائد حجاج مستفید ہو چکے ہیں، جبکہ اس کا دائرہ اب دس ممالک اور سترہ بین الاقوامی فضائی و زمینی راستوں تک بڑھ چکا ہے۔