کینیا: پٹرول مہنگا کرنے کے خلاف پرتشدد مظاہرے، 4 افراد ہلاک، 30 زخمی

نیروبی: کینیا میں حکومت کی جانب سے پٹرولیم مصنوعات کی قیمتوں میں 20 فیصد تک ریکارڈ اضافے کے خلاف ہونے والے ملک گیر احتجاج اور ٹرانسپورٹرز کی ہڑتال نے پرتشدد رخ اختیار کر لیا ہے، جس کے نتیجے میں اب تک 4 افراد ہلاک اور کم از کم 30 زخمی ہو چکے ہیں۔ کینیا کے وزیر داخلہ کِپچومبا مرکو مین کے مطابق، مظاہروں کے دوران توڑ پھوڑ اور پرتشدد کارروائیوں کے الزام میں اب تک 348 افراد کو گرفتار کیا جا چکا ہے۔ دارالحکومت نیروبی سمیت ملک کے مختلف حصوں میں مشتعل مظاہرین نے جلتے ہوئے ٹائر اور رکاوٹیں کھڑی کر کے اہم شاہراہوں کو بلاک کر دیا، جنہیں منتشر کرنے کے لیے پولیس کی جانب سے آنسو گیس کا شدید استعمال کیا گیا۔

ٹرانسپورٹ برادری کی جانب سے ہڑتال کی کال کے بعد ہزاروں مسافر سڑکوں پر پھنس کر رہ گئے، جبکہ کاروباری مراکز بند رہنے سے معاشی سرگرمیاں بری طرح متاثر ہوئیں۔ صورتحال کے پیشِ نظر تعلیمی اداروں نے طلبہ کو آن لائن کلاسز لینے کی ہدایات جاری کر دی ہیں۔ واضح رہے کہ کینیا، دیگر افریقی ممالک کی طرح، اپنی توانائی کی ضروریات کے لیے خلیجی ممالک سے ایندھن کی درآمدات پر شدید انحصار کرتا ہے۔ رواں برس 28 فروری سے شروع ہونے والے امریکہ، اسرائیل اور ایران کے مابین شدید تنازع کے باعث عالمی منڈی میں سپلائی چین متاثر ہوئی ہے، جس کا براہِ راست خمیازہ اب کینیا کے عوام کو مہنگائی اور اندرونی خلفشار کی صورت میں بھگتنا پڑ رہا ہے۔