امریکہ میں ایئر شو کے دوران 2 فوجی طیارے آپس میں ٹکرا کر تباہ ہوگئے

امریکی ریاست آئیڈاہو (Idaho) میں اتوار کے روز ایک فضائی کرتب (Air Show) کے دوران ایک ہولناک حادثہ پیش آیا ہے، جہاں امریکی فضائیہ کے 2 جدید ترین جنگی طیارے فضا میں آپس میں ٹکرا کر تباہ ہو گئے۔ غیر ملکی میڈیا کے مطابق یہ حادثہ ماؤنٹین ہوم ایئر فورس بیس سے محض 2 میل کی دوری پر اس وقت پیش آیا جب فضا میں کرتب دکھاتے ہوئے 2 امریکی فوجی طیارے ’ای اے 18 جی گرولر‘ (EA-18G Growler) کنٹرول کھو بیٹھنے کے باعث ایک دوسرے سے ٹکرا گئے اور زمین پر گر کر ملبے کے ڈھیر میں تبدیل ہو گئے۔

خوش قسمتی سے اس ہولناک حادثے کے نتیجے میں کوئی جانی نقصان نہیں ہوا، کیونکہ دونوں طیاروں میں موجود تمام 4 پائلٹس نے انتہائی مہارت اور پھرتی کا مظاہرہ کرتے ہوئے حادثے سے چند سیکنڈز قبل خود کو طیاروں سے ’ایمرجنسی ایجیکٹ‘ (Emergency Eject) کر لیا، جس کے باعث ان کی جانیں محفوظ رہیں۔ امریکی میڈیا کا کہنا ہے کہ واقعے کے فوری بعد امدادی ٹیموں نے جائے وقوعہ پر پہنچ کر پائلٹس کو طبی امداد فراہم کی اور علاقے کو گھیرے میں لے لیا۔ اس سنگین واقعے کی وجوہات جاننے کے لیے اعلیٰ سطحی تحقیقات کا آغاز کر دیا گیا ہے، جبکہ احتیاطی تدابیر کے طور پر عارضی طور پر ماؤنٹین ہوم ایئر فورس بیس کو مکمل لاک ڈاؤن کر دیا گیا ہے