ایران نے اسپیکر باقر قالیباف کو چین کے لیے خصوصی نمائندہ مقرر کردیا

تہران: ایران نے اہم سفارتی اقدام کرتے ہوئے پارلیمنٹ کے اسپیکر باقر قالیباف کو چین کے امور کے لیے خصوصی نمائندہ مقرر کر دیا ہے۔

ایرانی خبر رساں ایجنسی تسنیم کے مطابق باخبر ذرائع نے بتایا ہے کہ یہ تقرری حال ہی میں کی گئی ہے اور اس کے تحت وہ چین سے متعلق قومی اداروں کے درمیان رابطہ کاری کی ذمہ داریاں نبھائیں گے۔

رپورٹ کے مطابق اس تقرری کی سفارش صدر  مسعود پزشکیان نے کی تھی جسے بعد ازاں اعلیٰ سطحی منظوری حاصل ہوئی۔

ذرائع کا کہنا ہے کہ ان کی نئی ذمہ داری کا دائرہ کار ماضی کے نمائندوں کے مقابلے میں زیادہ وسیع اور مختلف ہے۔

تاہم اس حوالے سے یہ واضح نہیں کیا گیا کہ وہ اس نئی ذمہ داری کے ساتھ پارلیمنٹ کے اسپیکر کے عہدے پر بھی برقرار رہیں گے یا نہیں۔