جہاز رانی کی آزادی کی حفاظت ناگزیر، پاکستان کی ثالثی کے حامی ہیں: سعودی عرب

سعودی وزیر خارجہ شہزادہ فیصل بن فرحان نے بین الاقوامی سمندری گزرگاہوں میں جہاز رانی کی آزادی اور ان کی حفاظت کو یقینی بنانے کی ضرورت پر ایک بار پھر زور دیا ہے۔ یونان کے سرکاری دورے پر دارالحکومت ایتھنز پہنچنے کے بعد، انہوں نے اپنے یونانی ہم منصب جیورجوس جیرابیتریسیس سے تفصیلی ملاقات کی، جس میں دوطرفہ تاریخی تعلقات اور اقتصادی تعاون کی اہمیت پر تبادلہ خیال کیا گیا۔ اس دورے کے دوران دونوں رہنماؤں نے سعودی یونانی اسٹریٹجک پارٹنرشپ کونسل کے تحت قائم سیاسی کمیٹی کے اجلاس کی صدارت بھی کی۔

عالمی میڈیا کی رپورٹ کے مطابق، پریس کانفرنس سے خطاب کرتے ہوئے سعودی وزیر خارجہ نے خطے میں امن و امان کے قیام کے حوالے سے ایک اہم بیان دیا، جس میں انہوں نے امریکہ اور ایران کے درمیان کشیدگی اور جنگی ماحول کو ختم کرانے کے لیے پاکستان کی قیادت میں جاری ثالثی (Mediation) کی کوششوں کی بھرپور حمایت کا اعادہ کیا۔ انہوں نے واضح کیا کہ سعودی عرب خطے میں استحکام کے لیے سفارتی کوششوں کا حامی ہے اور یونان کے ساتھ مل کر مختلف شعبوں میں شراکت داری کو مزید آگے بڑھانے کے لیے پرعزم ہے۔