ریکو ڈک منصوبے کی فنانسنگ میں پیش رفت انتہائی خوش آئند ہے،علی پرویز ملک

ریکو ڈک منصوبے کی فنانسنگ کے حوالے سے اہم پیش رفت سامنے آگئی ہے۔ وفاقی وزیر پٹرولیم علی پرویز ملک سے او جی ڈی سی اور مل بینک کے وفد نے ملاقات کی، جس میں منصوبے کے فنانشل کلوز کے حصول پر تفصیلی تبادلہ خیال ہوا۔
لندن کی معروف لاء فرم مل بینک کے پارٹنر منیب حسین ریکو ڈک منصوبے کے فنانسرز کی نمائندگی کر رہے ہیں۔ وفد نے وفاقی وزیر کو فنانسنگ کے سلسلے میں ہونے والی مثبت پیش رفت سے آگاہ کیا۔
وفد کی بریفنگ پر وفاقی وزیر پٹرولیم علی پرویز ملک نے اطمینان کا اظہار کرتے ہوئے کہا کہ ریکو ڈک منصوبے کی فنانسنگ میں پیش رفت انتہائی خوش آئند ہے۔ انہوں نے کہا کہ حکومت پاکستان معدنیات اور توانائی کے شعبوں میں نئی سرمایہ کاری کو مکمل سپورٹ فراہم کر رہی ہے۔
علی پرویز ملک نے مزید کہا کہ پیٹرولیم سیکٹر میں تسلسل کے ساتھ گروتھ کے لیے پرعزم ہیں اور اس ضمن میں ہر ممکن اقدامات کیے جا رہے ہیں