پاکستان سٹاک مارکیٹ میں کاروبار کا مثبت زون میں آغاز

پاکستان اسٹاک مارکیٹ میں کاروباری ہفتے کے چوتھے روز کا آغاز انتہائی مثبت انداز میں ہوا ہے، جہاں سرمایہ کاروں کی جانب سے بھرپور دلچسپی کے باعث انڈیکس میں تیزی کا رجحان دیکھا جا رہا ہے۔ کاروبار کے آغاز پر ہی ہنڈرڈ انڈیکس میں 1000 سے زائد پوائنٹس کا اضافہ ریکارڈ کیا گیا، جس کے بعد انڈیکس ایک لاکھ 68 ہزار 528 پوائنٹس کی بلند سطح پر پہنچ گیا۔

واضح رہے کہ گزشتہ کاروباری روز مارکیٹ دباؤ کا شکار رہی تھی اور 1465 پوائنٹس کی کمی کے ساتھ ایک لاکھ 67 ہزار 451 پوائنٹس پر بند ہوئی تھی، تاہم آج کی تیزی نے گزشتہ روز کے نقصانات کا ازالہ کر دیا ہے۔

دوسری جانب ایشیائی اسٹاک مارکیٹوں میں آج ملا جلا رجحان پایا جا رہا ہے۔ جنوبی کوریا کے کوسپی انڈیکس میں ایک فیصد اور ہانگ کانگ کے ہینگ سینگ انڈیکس میں 0.26 فیصد کی تیزی دیکھی گئی، جبکہ جاپان کے نکی انڈیکس میں بھی معمولی اضافہ ہوا۔ اس کے برعکس چین کے شنگھائی کمپوزٹ انڈیکس میں 1.26 فیصد اور انڈونیشیا کے جکارتہ کمپوزٹ انڈیکس میں 2 فیصد کی مندی ریکارڈ کی گئی ہے۔