آئی ایم ایف کا وفد وزارت خزانہ پہنچ گیا، بجٹ مذاکرات کا باقاعدہ آغاز

عالمی مالیاتی فنڈ (آئی ایم ایف) کا وفد آئندہ مالی سال کے بجٹ پر مذاکرات کے لیے وزارتِ خزانہ پہنچ گیا ہے، جہاں تعارفی سیشن کے ساتھ ہی بات چیت کا باقاعدہ آغاز کر دیا گیا ہے۔ ذرائع کے مطابق، نیا وفاقی بجٹ آئی ایم ایف کی مشاورت سے تیار کیا جائے گا جس کے لیے وزارتِ خزانہ اور اسٹیٹ بینک کے حکام کے ساتھ اہم ملاقاتیں شیڈول ہیں۔ ان مذاکرات میں نئے بجٹ اہداف، ٹیکس ریونیو، مالیاتی و توانائی اصلاحات اور نجکاری کے عمل میں ہونے والی پیش رفت کا تفصیلی جائزہ لیا جائے گا۔ آئی ایم ایف نے شرط عائد کی ہے کہ وفد کی مشاورت سے طے پانے والے اہداف کی پارلیمنٹ سے منظوری لی جائے۔ وفاقی بجٹ کی تیاریاں آئندہ ہفتے تک مکمل ہونے کا امکان ہے، جبکہ آئی ایم ایف کا وفد 20 مئی تک پاکستان میں قیام کرے گا۔