اوپیک کی تیل کی پیداوار 26 سال کی کم ترین سطح پر آگئی

پیٹرولیم برآمد کرنے والے ممالک کی تنظیم ‘اوپیک’ کی تیل کی پیداوار میں تاریخی کمی ریکارڈ کی گئی ہے، جو گزشتہ 26 سال کی کم ترین سطح پر آگئی ہے۔ برطانوی خبر رساں ادارے کے حالیہ سروے کے مطابق، اپریل کے مہینے میں تیل کی مجموعی پیداوار 2 کروڑ بیرل یومیہ سے بھی کم ہوکر محض 8 لاکھ 30 ہزار بیرل رہ گئی ہے۔ آبنائے ہرمز کی بندش نے عالمی سپلائی چین کو شدید متاثر کیا ہے، جس کا سب سے زیادہ اثر کویت پر پڑا جہاں اپریل کے دوران خام تیل کی برآمدات صفر رہیں۔ توانائی کے بنیادی ڈھانچے پر حملوں کے نتیجے میں سعودی عرب کی پیداوار گر کر 70 لاکھ بیرل یومیہ تک پہنچ گئی ہے، جبکہ عراق کی پیداوار میں بھی نمایاں کمی دیکھی گئی۔ اس بحرانی صورتحال کے باوجود متحدہ عرب امارات وہ واحد خلیجی ملک رہا جس کی پیداوار میں اضافہ ہوا، جبکہ وینزویلا اور لیبیا کی پیداوار میں بھی اپریل کے دوران بہتری ریکارڈ کی گئی۔ تیل کی پیداوار میں اس غیر معمولی کمی نے عالمی منڈی میں توانائی کے بحران اور قیمتوں میں اضافے کے حوالے سے شدید خدشات پیدا کر دیے ہیں۔