عالمی ٹرانزٹ ٹریفک بڑھانے کیلئے گوادر پورٹ پر ٹیرف میں نمایاں کمی کا فیصلہ

وفاقی وزیر بحری امور جنید انوار چودھری نے گوادر بندرگاہ کو فعال بنانے اور عالمی ٹرانزٹ ٹریفک میں اضافے کے لیے ٹیرف میں نمایاں کمی کا اعلان کیا ہے۔ وفاقی وزیر کے مطابق کنٹینر بردار جہازوں کی برتھنگ فیس میں 25 فیصد، جبکہ انٹرنیشنل ٹرانس شپمنٹ کنٹینرز پر پورٹ چارجز میں 40 فیصد تک کمی کر دی گئی ہے۔

علاوہ ازیں، ٹرانزٹ کنٹینر کارگو پر پورٹ چارجز میں 31 فیصد کمی کی گئی ہے اور جنرل کارگو کے لیے ایک ماہ کی مفت سٹوریج سہولت بھی متعارف کرائی گئی ہے۔ جنید انوار چودھری نے واضح کیا کہ ٹرانزٹ اور ٹرانس شپمنٹ کارگو لانے والے جہازوں کو دیگر قومی بندرگاہوں کے مقابلے میں ریکارڈ مراعات دی جا رہی ہیں تاکہ گوادر کو خطے کا اہم لاجسٹکس مرکز بنایا جا سکے۔ انہوں نے مزید کہا کہ اس پالیسی پر عمل درآمد شروع کر دیا گیا ہے جس سے بندرگاہ کی تجارتی سرگرمیوں میں تیزی آئے گی۔