پیٹرول پر مجموعی لیوی 117 روپے سے تجاوز، حکومت نے آئی ایم ایف کی ایک اور شرط پوری کردی

اسلام آباد: وفاقی حکومت نے عالمی مالیاتی ادارے کی شرائط پوری کرتے ہوئے شہریوں پر پیٹرولیم لیوی کا بوجھ مزید بڑھا دیا، جس کے بعد پیٹرول پر مجموعی لیوی 117 روپے 41 پیسے فی لیٹر تک پہنچ گئی۔

حکومتی فیصلے کے مطابق پیٹرول اور ہائی اسپیڈ ڈیزل پر فی لیٹر 13 روپے 91 پیسے اضافی لیوی عائد کر دی گئی ہے۔ نئے اضافے کے بعد پیٹرول پر لیوی 103 روپے 50 پیسے سے بڑھا کر 117 روپے 41 پیسے فی لیٹر مقرر کی گئی ہے۔

اسی طرح ہائی اسپیڈ ڈیزل پر لیوی 28 روپے 69 پیسے سے بڑھ کر 42 روپے 60 پیسے فی لیٹر ہو گئی ہے۔

ذرائع کے مطابق حکومت نے پیٹرول اور ہائی اسپیڈ ڈیزل دونوں پر مجموعی طور پر 160 روپے فی لیٹر پیٹرولیم لیوی عائد کرنے کی شرط بھی مکمل کر لی ہے، جسے عوام پر ایک اور بڑا مالی دباؤ قرار دیا جا رہا ہے۔

معاشی ماہرین کے مطابق پیٹرولیم لیوی میں مسلسل اضافے سے مہنگائی میں مزید اضافہ ہونے کا خدشہ ہے جبکہ ٹرانسپورٹ اور روزمرہ اشیائے ضروریہ کی قیمتیں بھی متاثر ہو سکتی ہیں۔