پشاور میں ایف سی ہیڈ کوارٹر پر خودکش حملہ، 3 اہلکار شہید؛ تینوں حملہ آور مارے گئے

آئی جی خیبرپختونخوا پولیس ذوالفقار حمید نے بتایا کہ دو خودکش دھماکے ایف سی ہیڈ کوارٹر میں ہوئے پہلا مین گیٹ پر جبکہ دوسرا موٹر سائیکل اسٹینڈ پر، جو ہیڈ کوارٹر کے اندر واقع ہے۔ آئی جی کے مطابق فائرنگ کے تبادلے میں دو حملہ آور ہلاک ہوئے جبکہ موقع پر پولیس اور سیکیورٹی اہلکار کلیئرنس آپریشن میں مصروف ہیں۔

فیڈرل کانسٹیبلری کے ہیڈ کوارٹر پر حملہ  صبح 8 بج کر 10 منٹ پر ہوا۔ سی سی پی او کے مطابق تین خودکش حملہ آوروں نے ایف سی ہیڈ کوارٹر کو نشانہ بنایا۔ ایک نے مرکزی گیٹ پر خود کو اڑایا جبکہ دو اندر داخل ہوئے، تاہم ایف سی اہلکاروں نے بھرپور جوابی کارروائی کرتے ہوئے دونوں حملہ آوروں کو ہلاک کر دیا۔ ڈاکٹر میاں سعید نے کہا کہ ایف سی جوانوں نے بہادری سے حملے کو ناکام بنایا۔

ڈپٹی کمانڈنٹ ایف سی جاوید اقبال نے بھی تصدیق کی کہ تینوں خودکش حملہ آور مارے گئے ہیں اور دہشتگردوں کے مقابلے میں فیڈرل کانسٹیبلری کے 3 اہلکار شہید ہوئے۔

اسپتال ذرائع کے مطابق حملے میں 5 افراد زخمی ہوئے ہیں جن میں 2 ایف سی اہلکار اور 3 شہری شامل ہیں۔ زخمیوں کو اسپتال منتقل کر دیا گیا ہے اور تمام کی حالت تسلی بخش بتائی گئی ہے۔ سیکیورٹی فورسز نے علاقے کو گھیرے میں لے کر کلیئرنس آپریشن جاری رکھا ہوا ہے۔