این اے 185 ڈی جی خان میں وزراء کی موجودگی پر الیکشن کمیشن کا ایکشن، دو وزراء کو نوٹس جاری

لاہور : قومی اسمبلی کے حلقہ این اے 185 ڈیرہ غازی خان میں وزراء کی موجودگی سے متعلق میڈیا رپورٹس سامنے آنے پر الیکشن کمیشن حرکت میں آگیا۔ صوبائی الیکشن کمشنر پنجاب نے ڈسٹرکٹ مانیٹرنگ آفیسر سے واقعے کی فوری رپورٹ طلب کرلی ہے۔

ترجمان الیکشن کمیشن کے مطابق انتخابی ضابطہ اخلاق کی خلاف ورزی پر وزیر اعظم کے معاونِ خصوصی حذیفہ رحمان اور وفاقی وزیر اویس لغاری کو نوٹس جاری کرتے ہوئے 21 نومبر کو وضاحت پیش کرنے کی ہدایت کی گئی ہے۔

الیکشن کمیشن کا کہنا ہے کہ حلقے میں ضابطہ اخلاق پر سختی سے عملدرآمد کرایا جا رہا ہے اور خلاف ورزی پر کوئی رعایت نہیں دی جائے گی۔

ڈسٹرکٹ ریٹرننگ آفیسر کے مطابق حلقے میں سیاسی سرگرمیوں کی مختلف ذرائع سے کلوز مانیٹرنگ جاری ہے اور کسی بھی وزیر، مشیر یا سرکاری عہدیدار کو انتخابی مہم میں شرکت کی اجازت نہیں ہوگی۔

صوبائی الیکشن کمشنر نے واضح کیا کہ ضابطہ اخلاق کی خلاف ورزی پر فوری کارروائی کی جائے گی اور شفاف، غیرجانبدار اور منصفانہ انتخابات ہر صورت یقینی بنائے جائیں گے۔