ٹرمپ کا ایران کے خلاف حملے مؤخر کرنے کا اعلان

واشنگٹن: مشرقِ وسطیٰ میں جنگ کے بادل چھٹنے کی امید پیدا ہو گئی ہے۔ امریکی صدر ڈونلڈ ٹرمپ نے ایک اہم پیش رفت کا اعلان کرتے ہوئے ایران کے پاور پلانٹس اور توانائی کے بنیادی ڈھانچے پر مجوزہ فوجی حملے فی الحال 5 روز کے لیے مؤخر کر دیے ہیں۔ صدر ٹرمپ کے مطابق، انہوں نے محکمہ دفاع کو واضح ہدایات جاری کر دی ہیں کہ فی الحال تہران کے بجلی گھروں پر کوئی کارروائی نہ کی جائے۔

وائٹ ہاؤس سے جاری بیان میں صدر ٹرمپ نے انکشاف کیا کہ گزشتہ دو روز کے دوران امریکہ اور ایران کے درمیان ‘انتہائی مثبت اور تعمیری’ بات چیت ہوئی ہے۔ انہوں نے بتایا کہ ان مذاکرات کا بنیادی مقصد مشرقِ وسطیٰ میں جاری دشمنی اور کشیدگی کا مکمل خاتمہ ہے۔ صدر کا کہنا تھا کہ بات چیت کا عمل درست سمت میں گامزن ہے، جس کے باعث فوجی کارروائی کو عارضی طور پر روکنے کا فیصلہ کیا گیا ہے۔عالمی سیاسی مبصرین اس پیش رفت کو خطے میں امن کی جانب ایک بڑا قدم قرار دے رہے ہیں۔ ماہرین کا ماننا ہے کہ اگر یہ 5 روزہ مہلت کامیاب مذاکرات میں بدل گئی، تو اس سے نہ صرف مشرقِ وسطیٰ میں امن قائم ہوگا بلکہ عالمی معیشت اور تیل کی قیمتوں پر بھی مثبت اثرات مرتب ہوں گے۔ فی الحال عالمی برادری کی نظریں ان اہم مذاکرات کے حتمی نتائج پر لگی ہوئی ہیں۔