پاکستان میں شوال کا چاند نظرآگیا، عیدالفطرکل منائی جائے گی

پاکستان میں  شوال المکرم 1447 ہجری کا چاند نظر آگیا، ملک میں عید الفطر بروز ہفتہ منائی جائے گی۔سعودی عرب اور خلیجی ممالک سمیت دنیا بھر کے کئی ممالک میں جمعۃ المبارک کو عید الفطر مذہبی جوش و جذبے کے ساتھ منائی گئی۔

نماز عیدالفطر کے سب سے بڑے اجتماعات مسجد الحرام اور مسجد نبویؐ میں ہوئے، جہاں لاکھوں افراد نے نماز عید ادا کی اور روح پرور مناظر دیکھنے میں آئے۔

دوسری طرف جارح اسرائیلی فوج نے فلسطینیوں کو قبلہ اول مسجد اقصیٰ میں نماز عید ادا کرنے کی اجازت نہ دی، علاقے میں کشیدگی پھیل گئی، لبنان میں اسرائیلی جارحیت کے سائے میں عید منائی جا رہی ہے، ایران میں ہفتے کو عید منائی جائے گی۔

ادھر ترکیہ، یمن، فلسطین اور عراق میں بھی جمعۃ المبارک کو عید منائی گئی ہے، آسٹریلیا میں بھی آج عید ہے، آسٹریلوی وزیراعظم انتھونی البانیسی سڈنی کی مسجد گئے جہاں انہوں نے مسلمانوں کے تہوار میں شریک ہوکر انہیں مبارکباد دی۔

امریکا میں بھی عیدالفطرہفتے کو منائی جائے گی جبکہ برطانیہ سمیت یورپ بھر میں مسلم کمیونٹی کی بڑی تعداد نے جمعۃ المبارک کو عید منانے کا اعلان کیاتھا۔

روس کے دارالحکومت ماسکو میں عیدالفطرہفتے کومذہبی جوش و خروش کے ساتھ منائی جائے گی، جس کے لیے شہر بھر کی مساجد اور مخصوص مقامات پر انتظامات مکمل کر لیے گئے ہیں۔