سندھ حکومت نے 1,524 سرکاری گاڑیاں گراؤنڈ کر دیں، کفایت شعاری کے اقدامات جاری

سندھ کابینہ کی ذیلی کمیٹی برائے کفایت شعاری کے اہم فیصلے کے تحت مختلف سرکاری محکموں کی 60 فیصد گاڑیاں گراؤنڈ کر دی گئی ہیں۔ مجموعی طور پر 47 سے زائد محکموں میں موجود 2,837 گاڑیوں میں سے 1,524 گاڑیاں گراؤنڈ کی گئی ہیں، جن میں صحت، خزانہ، اسکول ایجوکیشن، انرجی اور اینٹی کرپشن کے محکمے شامل ہیں۔ بعض محکموں میں یہ شرح 65 فیصد سے تجاوز کر گئی، جبکہ انٹر پروونشل کوآرڈینیشن ڈیپارٹمنٹ میں تمام گاڑیاں گراؤنڈ کی گئیں۔

شرجیل انعام میمن کے مطابق یہ فیصلہ بڑھتے ہوئے ایندھن اخراجات کے پیشِ نظر کیا گیا تاکہ سرکاری اخراجات میں نمایاں کمی لائی جا سکے۔ کفایت شعاری کے اقدامات کا مقصد توانائی کی کھپت میں کمی، سرکاری وسائل کا مؤثر استعمال اور ایندھن کی مد میں کروڑوں روپے کی بچت یقینی بنانا ہے۔

اہم اور ہنگامی نوعیت کی گاڑیاں بدستور استعمال میں رہیں گی، جبکہ تمام محکموں کو پالیسی پر مکمل عملدرآمد کی ہدایت کی گئی ہے۔