جنگ بندی کی کوئی خلاف ورزی نہیں کی، افغان دعویٰ مضحکہ خیز ہے: وزارت اطلاعات

پاکستان نے افغان طالبان کے ترجمان کی جانب سے آپریشن غضب للحق کی عارضی معطلی کی خلاف ورزی کے دعوے کو مسترد کرتے ہوئے اسے مضحکہ خیز قرار دے دیا۔

وزارت اطلاعات کے مطابق پاکستان نے جنگ بندی کی کسی بھی خلاف ورزی کا ارتکاب نہیں کیا اور افغان عبوری حکومت کے الزامات بے بنیاد اور جھوٹ پر مبنی ہیں۔بیان میں کہا گیا کہ اس قسم کا پروپیگنڈا دہشت گردی کی کارروائیوں کو جواز فراہم کرنے کے لیے کیا جا رہا ہے، جبکہ یہ بھی ممکن ہے کہ یہ مہم طالبان حکومت کے اندر موجود مخالف عناصر کی جانب سے چلائی جا رہی ہو۔وزارت اطلاعات نے واضح کیا کہ پاکستان پہلے ہی بتا چکا ہے کہ کسی بھی قسم کی اشتعال انگیزی یا کارروائی کی صورت میں عارضی وقفہ ختم سمجھا جائے گا اور سرحد پار سے ہونے والے حملوں اور دہشت گردی کا بھرپور جواب دیا جائے گا۔

یاد رہے کہ عید الفطر کے احترام اور برادر اسلامی ممالک کی درخواست پر آپریشن غضب للحق کو عارضی طور پر معطل کیا گیا تھا۔

وزیر اطلاعات کے مطابق سعودی عرب، ترکیے اور قطر کی درخواست پر کارروائیاں روکی گئیں اور یہ معطلی 24 مارچ کی درمیانی شب تک برقرار رہنے کا اعلان کیا گیا تھا۔