سعودیہ، امارات، ترکیہ سمیت کئی ممالک میں آج عید الفطر، فلسطینی مسجد اقصیٰ میں نماز ادا کرنے سے محروم

سعودی عرب، خلیجی ریاستوں، ترکیہ، امریکہ اور آسٹریلیا سمیت دنیا کے بیشتر ممالک میں آج عید الفطر مذہبی جوش و جذبے کے ساتھ منائی جا رہی ہے۔ نمازِ عید کے سب سے بڑے اجتماعات مسجد الحرام اور مسجد نبویﷺ میں ہوئے جہاں لاکھوں فرزندانِ توحید نے نماز ادا کی۔ خادم حرمین شریفین شاہ سلمان بن عبدالعزیز نے عالمی امن و استحکام کے عزم کا اعادہ کرتے ہوئے امتِ مسلمہ کو عید کی مبارکباد دی ہے۔

دوسری جانب، مقبوضہ فلسطین میں اسرائیلی فوج نے مسلمانوں کو مسجدِ اقصیٰ کے اندر نماز کی اجازت نہ دی، جس پر شہریوں نے مسجد کے باہر ہی اجتماعات منعقد کیے۔ روس کے دارالحکومت ماسکو میں بھی عید کی تیاریاں مکمل ہیں جہاں مرکزی اجتماع جامع مسجد میں ہوگا۔ آسٹریلوی وزیراعظم انتھونی البانیسی نے سڈنی کی مسجد کا دورہ کر کے مسلم کمیونٹی کو مبارکباد دی، جبکہ برطانیہ اور یورپ میں بھی آج عید منائی جا رہی ہے۔

مشرقی ممالک بشمول پاکستان، بھارت، بنگلہ دیش، ملائیشیا اور انڈونیشیا میں شوال کا چاند نظر نہیں آیا، جس کے باعث ان ممالک میں عید الفطر کل بروز ہفتہ، 21 مارچ کو منائی جائے گی۔ دہلی اور ڈھاکہ کی رویتِ ہلال کمیٹیوں نے باضابطہ طور پر کل یکم شوال ہونے کا اعلان کر دیا ہے، جس کے بعد ان خطوں میں آج 30واں روزہ رکھا جا رہا ہے۔