خراب موسم : پاکستانی ایئر ٹریفک کنٹرول کی بروقت کارروائی، 30 طیارے وار زون میں داخل ہونے سے بچ گئے

لاہور میں پاکستان کے فضائی کنٹرول نظام نے بروقت اور مؤثر کارروائی کرتے ہوئے تقریباً 30 مسافر طیاروں کو ممکنہ خطرے سے بچا لیا۔

ایئرپورٹ ذرائع کے مطابق خراب موسم کے باعث متعدد طیارے ایران کے قریب واقع حساس فضائی حدود کی جانب بڑھ رہے تھے، جو کہ جنگی صورتحال کے باعث بند تھی۔

ذرائع کا کہنا ہے کہ کراچی فلائٹ انفارمیشن ریجن کے ایئر ٹریفک کنٹرولرز نے پیشہ ورانہ مہارت اور فوری فیصلہ سازی کا مظاہرہ کرتے ہوئے طیاروں کو خطرناک علاقے میں داخل ہونے سے روک لیا۔

بتایا گیا ہے کہ زیادہ تر طیارے ایران کی سرحد کے قریب شدید موسمی حالات کا شکار ہوگئے تھے اور ان کا رخ غیر ارادی طور پر ایرانی فضائی حدود کی جانب ہو رہا تھا، جو اس وقت بند اور حساس قرار دی جا چکی تھی۔

ذرائع کے مطابق تہران کے فضائی کنٹرول سے متعدد بار رابطہ کرنے کی کوشش کی گئی تاہم کوئی جواب موصول نہ ہوا، جس کے بعد پاکستانی کنٹرولرز نے خود ہی صورت حال کو سنبھالا۔

متاثرہ پروازوں میں سعودی عرب، دبئی اور دیگر ممالک سے آنے اور جانے والی پروازیں شامل تھیں، جنہیں محفوظ راستوں پر واپس لایا گیا۔

مزید بتایا گیا ہے کہ قلات سے پنجگور اور گوادر کی جانب جانے والے فضائی راستے پر موسم انتہائی خراب تھا، جس کے باعث پائلٹس نے بھی کنٹرول ٹاور کو آگاہ کیا کہ وہ اس راستے پر پرواز جاری رکھنے سے قاصر ہیں۔

پاکستانی ایئر ٹریفک کنٹرولرز نے مہارت سے طیاروں کی رہنمائی کرتے ہوئے انہیں متبادل راستوں پر منتقل کیا اور ایک بڑے ممکنہ حادثے کو ٹال دیا۔