وزیراعظم  شہبازشریف کا ترک صدر اردوان سے ٹیلیفونک رابطہ، باہمی تعاون کومزیدفروغ دینے پر اتفاق

وزیراعظم محمد شہباز شریف نے جمہوریہ ترکیہ کے صدررجب طیب اردوان سے ٹیلیفون پر رابطہ کیا اور صدر اردوان، ان کے اہلِ خانہ اور ترک عوام کو عید کی دلی مبارکباد پیش کی، جس کا صدر اردوان نے  پرتپاک جواب دیا۔

دونوں رہنماؤں نے امتِ مسلمہ کے لئے امن، اتحاد اور خوشحالی کی دعا بھی کی۔وزیراعظم نے خطے میں جاری کشیدگی، باالخصوص ترکیہ پر میزائل حملوں کی مذمت کا اعادہ کیا اور کہا کہ پوری پاکستانی قوم ان مشکل حالات میں اپنے ترک بھائیوں اور بہنوں کے ساتھ کھڑی ہے۔

دونوں رہنماؤں نے اس بات پر اتفاق کیا کہ علاقائی مسائل کا حل صرف مذاکرات اور سفارتکاری کے ذریعے ہی ممکن ہے، دونوں رہنماؤں نے افغانستان کی صورتحال پر بھی تبادلہ خیال کیا۔

وزیراعظم نے پاکستان اور افغانستان کے درمیان امن کے فروغ کے لئے اور خصوصاً عید کے ایام کے دوران حال ہی میں اعلان کردہ عارضی جنگ بندی کے حوالے سے ترکیہ کے تعمیری کردار کا اعتراف کیا۔

وزیراعظم نے فروری 2025 میں صدر اردوان کے تاریخی دورہ پاکستان اور اس کے بعد اپریل اور مئی 2025 میں اپنے دورہ ترکیہ کا ذکر کرتے ہوئے کہا کہ دونوں ممالک باہمی دلچسپی کے تمام شعبوں میں تعلقات کو مزید مضبوط بنانے کے لئے قریبی تعاون جاری رکھے ہوئے ہیں۔