پاکستان میں عید الفطر کب ہوگی؟ سپارکو نے شوال کے چاند سے متعلق اہم پیشگوئی کر دی

کراچی/اسلام آباد: قومی خلائی تحقیقی ادارے ‘سپارکو’ نے شوال المکرم 1447ھ کے چاند کی پیدائش اور رویت کے حوالے سے اہم فلکیاتی ڈیٹا جاری کر دیا ہے۔ سپارکو کے مطابق نئے چاند کی پیدائش 19 مارچ 2026 کو صبح 6 بج کر 23 منٹ پر ہوگی۔

فلکیاتی حسابات کے مطابق 19 مارچ کو غروبِ آفتاب کے وقت چاند کی عمر تقریباً 12 گھنٹے 41 منٹ ہوگی۔ پاکستان کے ساحلی علاقوں میں غروبِ آفتاب اور غروبِ ماہتاب کے درمیان تقریباً 28 منٹ کا فرق متوقع ہے، جس کی وجہ سے 19 مارچ کی شام چاند نظر آنے کے امکانات انتہائی کم ہیں۔

سپارکو کے فلکیاتی اندازے کے مطابق یکم شوال اور عید الفطر بروز ہفتہ 21 مارچ 2026 کو ہونے کا قوی امکان ہے۔ تاہم، سپارکو نے واضح کیا ہے کہ اسلامی مہینے کے آغاز اور چاند کی رویت کا حتمی فیصلہ مرکزی رویتِ ہلال کمیٹی کی ذمہ داری ہے، جو شرعی شہادتوں کی بنیاد پر عید کا باقاعدہ اعلان کرے گی۔