نائب وزیراعظم اسحاق ڈار کی سعودی، ترک اور مصری وزرائے خارجہ سے ملاقاتیں: علاقائی چیلنجز پر مشترکہ حکمت عملی پر اتفاق

نائب وزیراعظم اور وزیر خارجہ اسحاق ڈار نے عرب و اسلامی ممالک کے مشاورتی اجلاس کے موقع پر سعودی عرب، ترکیہ اور مصر کے وزرائے خارجہ سے الگ الگ اہم ملاقاتیں کی ہیں۔ ان ملاقاتوں میں خطے کی تیزی سے بدلتی ہوئی صورتحال اور درپیش سکیورٹی چیلنجز پر تفصیلی تبادلہ خیال کیا گیا۔

اسحاق ڈار نے برادر اسلامی ممالک کے ساتھ تعلقات کو مزید مضبوط بنانے کی ضرورت پر زور دیتے ہوئے کہا کہ پاکستان، سعودی عرب، ترکیہ اور مصر کے درمیان قریبی تعاون خطے میں پائیدار امن اور استحکام کے لیے ناگزیر ہے۔ ملاقاتوں کے دوران رہنماؤں نے مشترکہ خوشحالی کے فروغ اور علاقائی مسائل کے حل کے لیے ایک مربوط اور مشترکہ حکمت عملی اپنانے کے عزم کا اعادہ کیا۔

وزیر خارجہ نے واضح کیا کہ پاکستان برادر ممالک کے ساتھ مل کر امت مسلمہ کو درپیش مسائل اور علاقائی عدم استحکام کے خاتمے کے لیے اپنا بھرپور کردار ادا کرتا رہے گا۔ عالمی فورمز پر یکساں موقف اختیار کرنے اور معاشی و سفارتی تعاون بڑھانے پر بھی اتفاق کیا گیا۔