امریکی نشریاتی ادارے کی تحقیقات میں ایران کی جنگی کامیابیوں کی تصدیق

امریکی نشریاتی ادارے سی این این (CNN) کی ایک حالیہ تحقیقاتی رپورٹ میں ایران کی اہم جنگی کامیابیوں کی تصدیق کی گئی ہے۔ سیٹلائٹ تصاویر کے تفصیلی تجزیے پر مبنی اس رپورٹ کے مطابق، ایران نے جنگ کے ابتدائی مرحلے میں ہی اردن میں نصب امریکہ کے جدید ترین ’تھاڈ ائیر ڈیفنس سسٹم‘ (THAAD) کا ریڈار مکمل طور پر تباہ کر دیا تھا۔ رپورٹ میں مزید انکشاف کیا گیا ہے کہ متحدہ عرب امارات میں بھی دو مقامات پر تھاڈ ریڈارز کو نشانہ بنایا گیا، تاہم اماراتی ریڈارز عمارت کے اندر ہونے کے باعث وہاں پہنچنے والے نقصان کا حتمی اندازہ لگانا مشکل ہے۔ تحقیقات کے مطابق قطر میں موجود ’ارلی وارننگ ریڈار سسٹم‘ کو بھی ملبے کا ڈھیر بنا دیا گیا ہے۔ سی این این کا کہنا ہے کہ ایران کی حکمتِ عملی کا بنیادی محور کمیونیکیشن، ریڈار اور جاسوسی آلات کو نشانہ بنا کر اتحادی افواج کے دفاعی حصار کو مفلوج کرنا رہا ہے۔