امریکا اور ایران کے تنازع پر اقوامِ متحدہ کی تشویش، سفارتکاری کے ذریعے مسائل حل کرنے کی اپیل

اقوامِ متحدہ نے امریکا اور ایران کے درمیان بڑھتی کشیدگی پر گہری تشویش کا اظہار کیا ہے اور عالمی برادری پر زور دیا کہ مسائل کو مذاکرات اور سفارتکاری کے ذریعے حل کیا جائے۔ سیکرٹری جنرل انتونیو گوتریس کے ترجمان نے کہا کہ مشرقِ وسطیٰ میں فوجی نقل و حرکت اور جنگی مشقوں میں اضافہ خطرناک ہے۔

ایران نے اقوامِ متحدہ کو خط لکھ کر خبردار کیا کہ اگر امریکا نے جارحیت کی تو وہ اپنے دفاع کا حق استعمال کرے گا۔ امریکا اور ایران کے درمیان کشیدگی میں اضافے کے بعد دونوں جانب جنگ کے خدشات بڑھ گئے ہیں۔

رپورٹس کے مطابق امریکا کا دوسرا بحرہ بیڑا جیرالڈ فورڈ بحیرہ روم میں پہنچ چکا ہے اور پرتگال میں امریکی فضائی اڈوں پر لڑاکا طیارے تعینات ہیں۔ برطانوی خبر ایجنسی کے مطابق ممکنہ حملے میں امریکی فوج ایرانی حکومت اور رہنماؤں کو براہِ راست نشانہ بنا سکتی ہے۔