سکھس فار جسٹس کا بورڈ آف پیس کیلئے ایک ارب ڈالر کا اعلان

واشنگٹن ڈی سی: امریکہ میں مقیم سکھ برادری کے سینکڑوں ارکان نے واشنگٹن میں ایک بڑے اجتماع کے دوران “خالصتان” کو غزہ کی طرح ایک حل طلب سیاسی مسئلہ قرار دیتے ہوئے اس کے سفارتی اور جمہوری حل پر زور دیا ہے۔ اس موقع پر سکھس فار جسٹس (SFJ) نے “بورڈ آف پیس” کے پہلے سرکاری اجلاس کے لیے ایک بلین ڈالرز دینے کا تاریخی اعلان بھی کیا ہے۔

سکھس فار جسٹس کے جنرل کونسل گُرپتوانت سنگھ پنوُن نے خطاب کرتے ہوئے امریکی صدر ڈونلڈ ٹرمپ سے مطالبہ کیا کہ وہ بھارتی وزیراعظم نریندر مودی سے براہِ راست بات کریں تاکہ بھارتی پنجاب میں امریکی محکمہ خارجہ کی نگرانی میں آزادی ریفرنڈم کروایا جا سکے۔ پنوُن نے الزام عائد کیا کہ بھارتی پنجاب میں خالصتان کے حامی نوجوانوں کو جعلی مقابلوں میں نشانہ بنایا جا رہا ہے اور 11 ہزار سے زائد نوجوانوں کو سیاسی عقائد کی بنیاد پر گرفتار کر کے ‘گینگسٹر’ کا لیبل لگا دیا گیا ہے۔

مظاہرین کا کہنا تھا کہ وہ تشدد کے بجائے پرامن اور جمہوری طریقے سے آزادی حاصل کرنا چاہتے ہیں۔ انہوں نے صدر ٹرمپ پر زور دیا کہ کسی بھی ممکنہ خونریزی سے بچنے کے لیے عالمی نگرانی میں ریفرنڈم کو یقینی بنایا جائے۔ تجزیہ کاروں کے مطابق، اتنی خطیر رقم کے اعلان اور واشنگٹن میں اس احتجاج کا مقصد امریکی سیاست میں خالصتان کے مطالبے کو فیصلہ کن طور پر اجاگر کرنا ہے، جو آنے والے دنوں میں بھارت اور امریکہ کے سفارتی تعلقات کے لیے ایک نیا چیلنج بن سکتا ہے۔