وزیراعظم کی امریکا میں مختلف ممالک کے صدور سے ملاقاتیں، غزہ پر تبادلہ خیال

وزیراعظم محمد شہباز شریف نے امریکی صدر ڈونلڈ ٹرمپ کی دعوت پر ‘بورڈ آف پیس’ کے افتتاحی اجلاس میں شرکت کی، جہاں انہوں نے عالمی رہنماؤں سے غیر رسمی اور خوشگوار ملاقاتیں کیں۔

وزیراعظم کی بحرین کے فرمانروا شاہ حماد بن عیسیٰ الخلیفہ، آذربائیجان، ازبکستان، قازقستان اور انڈونیشیا کے صدور سے ملاقاتیں ہوئیں جن میں اہم عالمی و علاقائی امور پر تبادلہ خیال کیا گیا۔ بورڈ آف پیس کے اجلاس سے خطاب کرتے ہوئے وزیراعظم نے تنازعات کے حل میں صدر ٹرمپ کے کردار کی تعریف کی اور کہا کہ ان کی بروقت مداخلت نے ماضی میں پاک بھارت جنگ روک کر جنوبی ایشیا کو بڑی تباہی سے بچایا۔

وزیراعظم نے فلسطینی عوام کے حقوق کی بھرپور حمایت کرتے ہوئے کہا کہ آزاد اور خودمختار فلسطینی ریاست کا قیام پائیدار امن کے لیے ناگزیر ہے۔ انہوں نے مطالبہ کیا کہ سلامتی کونسل کی قراردادوں کے مطابق فلسطینیوں کو ان کا حق دیا جائے اور غزہ میں فوری جنگ بندی کو یقینی بنایا جائے۔ پاکستان کی اس فورم میں شمولیت کو عالمی امن اور کامیاب سفارتی پالیسی کی عکاسی قرار دیا جا رہا ہے۔