امریکا کا یورپ میں کئی نیٹو کمانڈروں کے عہدے یورپی ممالک کو منتقل کرنے کا فیصلہ

امریکا نے یورپ میں نیٹو کے کئی کمانڈروں کے عہدے یورپی ممالک کو منتقل کرنے کا فیصلہ کر لیا ہے۔

عالمی میڈیا رپورٹس کے مطابق نیٹو کے لیے امریکی سفیر میتھیو وائٹکر نے اپنے بیان میں کہا کہ امریکا نیٹو کو مزید مضبوط دیکھنا چاہتا ہے۔ انہوں نے کہا کہ اتحاد اپنے 32 رکن ممالک کے ساتھ پہلے سے زیادہ مؤثر اور مضبوط ثابت ہوگا۔

ان کا کہنا تھا کہ یہ اقدام صدر ڈونلڈ ٹرمپ کی اس پالیسی کا حصہ ہے جس کے تحت اتحادی ممالک کو اپنے دفاع کے معاشی بوجھ میں زیادہ حصہ ڈالنا ہوگا۔

رپورٹ کے مطابق عملی پیش رفت کرتے ہوئے امریکا نیٹو کی نیپلز کمانڈ اٹلی کے سپرد کرے گا، جو جنوبی یورپ کے امور کی نگرانی کرتی ہے۔ اسی طرح شمالی دفاعی ذمہ داریوں کے لیے کمانڈ برطانیہ کے حوالے کرنے کا اصولی فیصلہ کیا گیا ہے۔

دریں اثنا امریکا برطانیہ میں میری ٹائم کمانڈ سنبھالے گا، جو بحری امور سے متعلق اہم ذمہ داریاں انجام دیتی ہے۔

واضح رہے کہ نیٹو کمانڈرز کی ممکنہ تبدیلی سے متعلق خبر ابتدائی طور پر فرانس کے جریدے “لا لیٹر” نے شائع کی تھی۔ تاہم ذرائع کے مطابق ان فیصلوں کو حتمی شکل دینے میں کئی ماہ لگ سکتے ہیں۔