دہشتگردی سنگین خطرہ، پاکستان کا اقوام متحدہ سے بی ایل اے پر پابندی کا مطالبہ

اقوام متحدہ میں پاکستان کے مستقل مندوب عاصم افتخار نے دہشتگردی کو عالمی امن و سلامتی کے لیے ایک سنگین خطرہ قرار دیتے ہوئے بلوچ لبریشن آرمی (بی ایل اے) پر پابندی عائد کرنے کا مطالبہ کر دیا ہے۔

سلامتی کونسل کے اجلاس سے خطاب کرتے ہوئے عاصم افتخار نے افغانستان میں دہشتگردوں کی محفوظ پناہ گاہوں پر گہری تشویش کا اظہار کیا اور کہا کہ دہشتگردی کے خلاف جنگ میں پاکستان ایک فرنٹ لائن ریاست کے طور پر کردار ادا کر رہا ہے۔

انہوں نے کہا کہ عالمی انسدادِ دہشتگردی کی کوششوں میں پاکستان نے بے مثال قربانیاں دی ہیں، جن میں 90 ہزار سے زائد قیمتی جانوں کا نقصان اور بھاری معاشی خسارہ شامل ہے۔ ان کا کہنا تھا کہ کابل پر طالبان کے قبضے کے بعد دہشتگرد تنظیموں کو نئی زندگی ملی اور افغان سرزمین پاکستان کے خلاف دہشتگرد کارروائیوں کے لیے استعمال ہو رہی ہے۔

پاکستان کے مستقل مندوب نے مقبوضہ کشمیر میں بھارت کی ریاستی دہشتگردی کی بھی شدید مذمت کرتے ہوئے کہا کہ بھارتی اقدامات ناقابل قبول ہیں۔ انہوں نے واضح کیا کہ کشمیری عوام کی حقِ خودارادیت کی جدوجہد کو دہشتگردی قرار نہیں دیا جا سکتا۔

عاصم افتخار نے عالمی برادری پر زور دیا کہ وہ دہشتگرد تنظیموں کے خلاف غیر جانبدار اور مؤثر اقدامات کرے تاکہ خطے اور دنیا میں پائیدار امن قائم ہو سکے۔