امریکی جنگی طیارے نے طیارہ بردار بحری جہاز کے قریب آنے والا ایرانی ڈرون مار گرایا

امریکا نے بحیرہ عرب میں اپنے بحری بیڑے کی جانب پرواز کرنے والے ایرانی ڈرون کو مار گرانے کا دعویٰ کیا ہے۔ غیر ملکی خبر رساں ایجنسی کے مطابق امریکی ایف-35 جنگی طیارے نے ایرانی ڈرون کو نشانہ بنایا۔

امریکی عہدیدار کا کہنا ہے کہ ڈرون امریکی طیارہ بردار بحری جہاز ابراہم لنکن کی جانب بڑھ رہا تھا، جسے حفاظتی اقدام کے تحت مار گرایا گیا۔

وائٹ ہاؤس کی ترجمان کیرولین لیوٹ کے مطابق ایرانی ڈرون مار گرائے جانے کے باوجود ایران کے ساتھ رواں ہفتے طے شدہ بات چیت اپنے شیڈول کے مطابق ہوگی۔

خبر ایجنسی کے مطابق مار گرایا جانے والا ڈرون شہید-139 تھا۔ امریکی سینٹ کام کے ترجمان ٹم ہاکنز نے بھی واقعے کی تصدیق کرتے ہوئے کہا کہ کارروائی بحری بیڑے اور عملے کے تحفظ کے لیے کی گئی، جس میں کسی امریکی فوجی یا سازوسامان کو نقصان نہیں پہنچا۔

رپورٹ کے مطابق واقعے کے بعد عالمی منڈی میں تیل کی فیوچر قیمتوں میں فی بیرل ایک ڈالر سے زائد اضافہ دیکھا گیا۔