سعودی عرب میں غیر قانونی تارکین وطن کے خلاف کارروائیاں تیز،

سعودی عرب میں غیر قانونی تارکین وطن کے خلاف کارروائیاں مزید تیز کر دی گئی ہیں۔ مقامی میڈیا رپورٹس کے مطابق ایک ہفتے کے دوران اقامہ، لیبر اور سرحدی قوانین کی مجموعی طور پر 19 ہزار 975 خلاف ورزیاں ریکارڈ کی گئیں، جبکہ 14 ہزار 867 غیر قانونی تارکین کو ان کے آبائی ممالک واپس بھیج دیا گیا۔

سعودی پریس ایجنسی (ایس پی اے) کے مطابق 22 سے 28 جنوری 2026 کے دوران 12 ہزار 906 اقامہ قوانین، 3 ہزار 918 بارڈر سکیورٹی اور 3 ہزار 151 لیبر قوانین کی خلاف ورزیاں سامنے آئیں۔

رپورٹ کے مطابق غیر قانونی طور پر سعودی عرب میں داخل ہونے کی کوشش پر 1,419 افراد کو گرفتار کیا گیا، جن میں 60 فیصد ایتھوپین، 39 فیصد یمنی اور ایک فیصد دیگر ممالک سے تعلق رکھتے ہیں۔

حکام نے 48 ایسے افراد کو بھی حراست میں لیا ہے جو سرحد پار کر کے سعودی عرب سے ہمسایہ ممالک میں داخل ہونے کی کوشش کر رہے تھے، جبکہ سفر، رہائش، روزگار اور پناہ فراہم کرنے میں ملوث 11 افراد کو بھی گرفتار کیا گیا ہے۔

سعودی وزارت داخلہ نے واضح کیا ہے کہ غیر قانونی تارکین وطن کو سفری، رہائشی یا ملازمت کی سہولت فراہم کرنا قانوناً جرم ہے۔ ایسے افراد کو 15 سال تک قید، 10 لاکھ سعودی ریال تک جرمانہ، گاڑی اور جائیداد کی ضبطی جیسی سخت سزاؤں کا سامنا کرنا پڑ سکتا ہے۔