اسحاق ڈار کی زیر صدارت پاکستان اور یورپی یونین کے اقتصادی و تجارتی تعلقات مضبوط بنانے کے لیے اعلیٰ سطحی اجلاس

ترجمان دفتر خارجہ کے مطابق نائب وزیراعظم اور وزیر خارجہ اسحاق ڈار کی زیر صدارت پاکستان اور یورپی یونین کے درمیان اقتصادی و تجارتی تعلقات کو مضبوط بنانے کے لیے ایک اعلیٰ سطحی اجلاس منعقد ہوا۔

اسحاق ڈار نے اجلاس سے خطاب کرتے ہوئے پاکستان اور یورپی یونین کے درمیان تجارتی تعاون بڑھانے اور نئی اقتصادی شراکت داریوں کے مواقع تلاش کرنے پر زور دیا۔ ان کا کہنا تھا کہ جی ایس پی پلس پاکستان کی معاشی ترقی کے لیے ایک کلیدی فریم ورک کی حیثیت رکھتا ہے۔

نائب وزیراعظم نے جی ایس پی پلس سے زیادہ سے زیادہ فوائد حاصل کرنے کی ضرورت پر بھی زور دیا تاکہ برآمدات میں اضافہ اور معاشی استحکام ممکن بنایا جا سکے۔

اجلاس میں وفاقی وزیر تجارت، اسپیشل اسسٹنٹ ٹو پرائم منسٹر طارق باجوہ، سیکرٹری خارجہ آمنہ بلوچ اور دیگر اعلیٰ حکام نے شرکت کی۔ اس کے علاوہ وفاقی و صوبائی وزارتوں اور متعلقہ محکموں کے سینئر افسران بھی اجلاس میں موجود تھے۔

اجلاس کے دوران پاکستان اور یورپی یونین کے درمیان اقتصادی تعلقات کو مزید گہرا کرنے اور باہمی تعاون کے مختلف پہلوؤں پر تفصیلی غور کیا گیا۔