ٹرمپ کا کیوبا کو تیل فروخت کرنے والے ممالک پر ٹیرف لگانے کا اعلان

امریکی صدر ڈونلڈ ٹرمپ نے کیوبا کو تیل فروخت کرنے والے ممالک کے خلاف سخت اقدام کا اعلان کرتے ہوئے ان کی اشیا پر ٹیرف عائد کرنے کا فیصلہ کر لیا ہے۔

خبر ایجنسی کے مطابق امریکی صدر نے اس حوالے سے طریقہ کار طے کرتے ہوئے ایگزیکٹو آرڈر پر دستخط کر دیے ہیں، جس کے تحت کیوبا کو تیل فراہم کرنے والے ممالک کی برآمدات کو امریکی ٹیرف کا سامنا کرنا پڑے گا۔

واضح رہے کہ یہ اقدام کیوبا پر دباؤ بڑھانے کے لیے امریکی حکمتِ عملی کا حصہ ہے۔ اس سے قبل ڈونلڈ ٹرمپ دعویٰ کر چکے ہیں کہ کیوبا معاشی طور پر کمزور ہو چکا ہے اور اسے مذاکرات کرنا ہوں گے، بصورت دیگر اسے وینزویلا جیسے انجام کا سامنا کرنا پڑ سکتا ہے۔

دوسری جانب امریکی صدر کی دھمکیوں کے جواب میں کیوبا کے صدر نے کہا ہے کہ کیوبا اپنے دفاع کے لیے مکمل طور پر تیار ہے اور کسی بھی جارحیت کی صورت میں امریکا کو بھاری قیمت چکانا پڑے گی۔