جرمن سفیر کی وفاقی وزیر خزانہ سے ملاقات، پاکستان-جرمنی اقتصادی تعاون کو مزید مضبوط بنانے پر اتفاق

اسلام آباد: جرمن سفیر اینا لیپل نے وفاقی وزیر خزانہ محمد اورنگزیب سے ملاقات کی، جس میں دونوں فریقین نے پاکستان اور جرمنی کے درمیان اقتصادی تعاون کے فروغ پر تفصیلی تبادلۂ خیال کیا۔

ملاقات کے دوران تجارت، سرمایہ کاری اور ترقیاتی شراکت داری مضبوط بنانے پر اتفاق کیا گیا۔ وزیر خزانہ نے معاشی اصلاحات، مالیاتی استحکام اور پائیدار ترقی پر زور دیتے ہوئے جرمن سفیر کو ٹیکس نظام میں اصلاحات، ٹیکس بیس میں توسیع اور جدید ٹیکنالوجی کے استعمال کے حوالے سے بریفنگ دی۔

محمد اورنگزیب نے شفاف، مستحکم اور سرمایہ کار دوست کاروباری ماحول کی اہمیت اجاگر کی اور ٹیکس انتظامیہ کی بہتری اور سروس ڈیلیوری میں کیے گئے اقدامات پر بھی روشنی ڈالی۔

جرمن سفیر نے پاکستان کی حکومتی اصلاحاتی اقدامات کا خیرمقدم کیا اور عالمی و علاقائی معاشی چیلنجز کے پیش نظر مشترکہ تعاون کی ضرورت پر اتفاق کیا۔