برفانی طوفان نے امریکا کو مفلوج کر دیا، 14 ہلاکتیں، لاکھوں افراد متاثر

امریکا اس وقت شدید برفانی طوفان اور خطرناک سردی کی زد میں ہے، جہاں مختلف حادثات کے نتیجے میں 14 افراد جان کی بازی ہار گئے ہیں۔ موسمی رپورٹس کے مطابق متعدد ریاستوں میں ایک فٹ سے زیادہ برفباری ریکارڈ کی گئی ہے، جبکہ بعض علاقوں میں کئی دہائیوں کی سخت ترین سردی محسوس کی جا رہی ہے۔

برفانی طوفان کے باعث فضائی نظام بری طرح متاثر ہوا ہے اور 17 ہزار سے زائد پروازیں منسوخ کر دی گئی ہیں، جبکہ 10 لاکھ سے زیادہ افراد بجلی کی بندش کا سامنا کر رہے ہیں۔ 44 ریاستوں میں 20 کروڑ کے قریب افراد کے لیے شدید سردی کا الرٹ جاری ہے اور 24 ریاستوں میں ہنگامی حالت نافذ کر دی گئی ہے۔

نیویارک، واشنگٹن، ٹیکساس، اوکلاہوما اور نیوجرسی سمیت کئی ریاستوں میں تیز سرد ہواؤں کے ساتھ شدید برفباری اور بارش جاری ہے۔ نیویارک کے دیہی علاقوں میں درجہ حرارت منفی 49 تک گر گیا، واشنگٹن میں آج وفاقی دفاتر بند ہیں جبکہ نیویارک سٹی میں اسکول آن لائن کلاسز کروا رہے ہیں۔

محکمہ موسمیات کا کہنا ہے کہ آرکٹک ہواؤں کی وجہ سے شدید سردی کا یہ سلسلہ مزید کئی روز تک جاری رہ سکتا ہے۔