اسپین نے بھی ٹرمپ کے غزہ بورڈ میں شمولیت سے انکارکردیا

بیشتر یورپی ممالک کی طرح اب  اسپین نے بھی امریکی صدر ڈونلڈ ٹرمپ  کے غزہ امن بورڈ میں شمولیت سے انکار کردیا۔

اسپین کے وزیراعظم پیڈرو سانچیز نے برسلز میں یورپی یونین کے اجلاس کے بعد صحافیوں سے گفتگو میں کہاکہ  امریکی صدر کی جانب سے بورڈ آف پیس میں شمولیت کی دعوت کو قدر کی نگاہ سے دیکھتے ہیں لیکن اسے قبول نہیں کرسکتے۔ یہ امن بورڈ غزہ کے مستقبل کا فیصلہ غلط فہمی اور اقوام متحدہ کے دائرہ کار سے باہر کر رہا ہے۔

ہسپانوی وزیراعظم نے شکوہ کیا کہ بورڈ آف پیس میں فلسطینی اتھارٹی کو بھی شامل نہیں کیا گیا حالانکہ سب سے زیادہ حق فلسطینیوں کا بنتا ہے۔غزہ اور مغربی کنارے کے مستقبل کا فیصلہ فلسطینی عوام نے خود کرنا ہے نہ کہ کسی بیرونی بورڈ کے ذریعے فیصلے کیے جائیں۔

اسپین سے پہلے فرانس، ناروے، برطانیہ اور کینیڈا نے بھی ٹرمپ کے بورڈ آف پیس میں شمولیت سے یا تو انکار کیا یا پھر محتاط رویہ اختیار کیا ۔یورپی یونین نے بھی ٹرمپ کے بورڈ آف پیس پر تشویش کا اظہار کیا ہے۔