آئی ایم ایف نے پاکستان کی معاشی شرح نمو میں 0.4 فیصد کمی کر دی

عالمی مالیاتی فنڈ (آئی ایم ایف) نے پاکستان کی معاشی شرحِ نمو میں کمی کا تخمینہ لگاتے ہوئے موجودہ مالی سال 2026 کیلئے مجموعی قومی پیداوار (جی ڈی پی) کی شرح نمو 3.6 فیصد سے کم کر کے 3.2 فیصد کر دی ہے۔

آئی ایم ایف کے مطابق معاشی شرح نمو میں یہ کمی ملکی معیشت میں موجود مستقل ساختی کمزوریوں کی عکاس ہے جو تاحال معاشی کارکردگی پر اثر انداز ہو رہی ہیں۔ ورلڈ اکنامک آؤٹ لک کی تازہ رپورٹ کے مطابق اکتوبر میں دیے گئے اندازوں کے مقابلے میں پاکستان کی معاشی شرح نمو میں 0.4 فیصد کمی کی گئی ہے۔

آئی ایم ایف نے پیشگوئی کی ہے کہ اگر اصلاحاتی اقدامات جاری رہے تو اگلے مالی سال 2027 میں پاکستان کی جی ڈی پی شرح نمو بہتر ہو کر 4.1 فیصد تک پہنچ سکتی ہے۔

دوسری جانب قومی اقتصادی کونسل نے تاحال سرکاری طور پر شرح نمو میں کمی کی منظوری نہیں دی، جبکہ وزارت خزانہ کا مؤقف ہے کہ موجودہ مالی سال میں مجموعی معاشی شرح نمو 4 فیصد کے قریب رہ سکتی ہے، تاہم اس کا حتمی انحصار دوسری سہ ماہی کے اعداد و شمار پر ہوگا۔