بگ بیش لیگ: اسٹیو اسمتھ نے بابر اعظم کے شاٹ پر سنگل نہ لینے کی وجہ بتا دی

سڈنی: آسٹریلیا کی ٹی ٹوئنٹی لیگ بگ بیش میں سڈنی سکسرز کے بیٹر اسٹیو اسمتھ نے جمعہ کو کھیلے گئے میچ میں بابر اعظم کے شاٹ پر سنگل نہ لینے کی وجہ واضح کر دی۔

11ویں اوور کی آخری گیند پر بابر اعظم نے اسٹروک کھیلتے ہوئے سنگل لینے کی خواہش ظاہر کی، تاہم اسمتھ نے اگلے اوور میں خود اسٹرائیک پر رہنے کے لیے سنگل لینے سے انکار کر دیا۔ اس وقت بابر نے پہلے تین ڈاٹ بالز کھیلیں تھیں اور آخری گیند پر سنگل لے کر پاور سرج کا آغاز کرنا چاہتے تھے، لیکن اسمتھ کے فیصلے پر وہ ناخوش نظر آئے۔

بعد ازاں اس اوور میں اسمتھ نے شاندار بلے بازی کرتے ہوئے چار چھکے اور ایک چوکے کی مدد سے 32 رنز بنائے۔ انہوں نے 42 گیندوں پر برق رفتاری سنچری سکور کی، جبکہ بابر اعظم نے 39 گیندوں پر 47 رنز بنائے۔ سڈنی سکسرز نے سڈنی تھنڈر کا 190 رنز کا ہدف 18ویں اوور میں حاصل کر لیا۔

میچ کے بعد پریزنٹیشن کے دوران اسمتھ نے بتایا کہ وہ بابر اعظم کو ایک اضافی اوور دینا چاہتے تھے تاکہ پاور سرج میں چھوٹی باؤنڈری کی طرف تیز رنز بنا سکیں۔ اسمتھ نے اعتراف کیا کہ انہیں نہیں لگتا کہ بابر اس فیصلے سے خوش تھے، تاہم حکمت عملی کامیاب رہی۔