75 ملکوں کے امیگرنٹ ویزا روکنے کا فیصلہ غیرمصدقہ معلومات پر مبنی ہیں، امریکی ماہر خارجہ امور کا دعویٰ

واشنگٹن: امریکا کے ماہر خارجہ امور اور جنوبی ایشیا کے تجزیہ کار مائیکل کوگل مین نے کہا ہے کہ امریکا کی جانب سے 75 ملکوں کے امیگرنٹ ویزوں پر کارروائی روکنے کا حالیہ فیصلہ ایک غیرمصدقہ چارٹ پر مبنی ہے، جس کے اعداد و شمار کا کوئی واضح ماخذ معلوم نہیں۔

سوشل میڈیا پر ایک پوسٹ میں مائیکل کوگل مین نے بتایا کہ یہ چارٹ سابق صدر ڈونلڈ ٹرمپ نے شیئر کیا تھا، جس میں ان تارکین وطن کی برادریوں کی فہرست موجود ہے جو امریکا کی سرکاری امداد کا سب سے بڑا حصہ وصول کر رہی ہیں۔ تاہم، اس چارٹ کے اعداد و شمار کی درستگی مشکوک ہے اور کچھ نتائج غیر منطقی نظر آتے ہیں۔

کوگل مین کے مطابق، اس چارٹ میں پاکستانی تارکین وطن کے بارے میں دعویٰ کیا گیا کہ 40 فیصد امریکی سرکاری امداد حاصل کرتے ہیں، جبکہ حقیقت میں امریکا میں پاکستانی برادری کافی خوشحال ہے۔ امریکا میں پاکستانیوں کی اوسط آمدنی 76 ہزار ڈالر ہے، جو امریکی اوسط آمدنی 64 ہزار ڈالر سے زیادہ ہے، یہ بات پاکستان کے سفیر رضوان سعید شیخ نے نیویارک میں ایک تقریب کے دوران بتائی تھی۔