پاک نیوی کے بحری بیڑے کا مسقط کا دورہ، مشترکہ مشق میں حصہ لیا

پاک نیوی کے بحری بیڑے نے عمان کے سلطان قابوس بندرگاہ کا باضابطہ دورہ کیا۔ بحری بیڑے میں پی این ایس راہ نورد، پی این ایس مددگار اور پی ایم ایس ایس کشمیر شامل تھے۔ عمانی حکام نے پاک نیوی کے بحری بیڑے کا شاندار استقبال کیا۔

دورے کے دوران مشن کمانڈر اور کمانڈنگ افسران نے عمان کی رائل نیول قیادت سے ملاقاتیں کیں، جن میں ڈی جی آپریشنز اینڈ پلانز، میری ٹائم سکیورٹی سنٹر کے کمانڈر، نیول بیس کے کمانڈر سید بن سلطان اور سلطان قابوس نیول اکیڈمی کے کمانڈنٹ شامل تھے۔

پاک نیوی کے جہازوں نے عمان کی رائل بحریہ کے جہاز ’خسب‘ کے ساتھ مشترکہ بحری مشقیں بھی کیں۔ مشقوں کا مقصد دونوں بحری افواج میں تعاون کو مضبوط کرنا اور تجربات کے تبادلے کو فروغ دینا تھا۔ بندرگاہی دورے اور مشترکہ مشقیں دونوں ملکوں کی نیول فورسز کے لیے معمول کا حصہ ہیں۔