امریکا کے بغیر نیٹو بے بس ہے، چین اور روس صرف ہم سے ڈرتے ہیں، صدر ٹرمپ

واشنگٹن: امریکی صدر ڈونلڈ ٹرمپ نے سوشل میڈیا پر اپنے حالیہ بیانات میں کہا ہے کہ چین اور روس صرف امریکا سے ڈرتے اور اسی کی عزت کرتے ہیں، جبکہ نیٹو کے بغیر عالمی طاقتیں بے خوف ہو جائیں گی۔

صدر ٹرمپ نے کہا کہ امریکا ہمیشہ نیٹو کے لیے موجود رہا ہے، چاہے نیٹو امریکا کے لیے موجود نہ ہو، تاہم اب انہیں اس بات پر شک ہے کہ اگر امریکا کو ضرورت پڑی تو کیا نیٹو ممالک اس کے ساتھ کھڑے ہوں گے یا نہیں۔

انہوں نے نیٹو رکن ممالک پر شدید تنقید کرتے ہوئے کہا کہ زیادہ تر ممالک اپنی مجموعی قومی پیداوار (جی ڈی پی) کا 2 فیصد دفاع پر خرچ کرنے کی ذمہ داری پوری نہیں کر رہے تھے اور اس کا بوجھ امریکا کو اٹھانا پڑ رہا تھا۔

ٹرمپ کا کہنا تھا کہ اپنی کوششوں کے نتیجے میں انہوں نے بعض ممالک کو دفاعی اخراجات 5 فیصد تک بڑھانے پر مجبور کیا، جو اس سے قبل ناممکن سمجھا جا رہا تھا۔

امریکی صدر کے مطابق نیٹو کی مضبوطی عالمی امن کے لیے ناگزیر ہے، لیکن اس کے تمام ارکان کو اپنی ذمہ داریاں مساوی طور پر ادا کرنا ہوں گی۔