امریکی صدر ٹرمپ کا پاکستان سمیت متعدد ممالک پر خفیہ جوہری تجربات کا الزام

واشنگٹن: امریکی صدر ڈونلڈ ٹرمپ نے دعویٰ کیا ہے کہ چین، روس، شمالی کوریا اور پاکستان سمیت کئی ممالک خفیہ طور پر جوہری ہتھیاروں کے تجربات کر رہے ہیں۔

امریکی نشریاتی ادارے کو دیے گئے انٹرویو میں ٹرمپ کا کہنا تھا کہ روس اور چین ایٹمی تجربات کر رہے ہیں، جبکہ شمالی کوریا اور پاکستان بھی جوہری ٹیسٹ کر رہے ہیں مگر وہ اس کا اعلان نہیں کرتے۔
صدر ٹرمپ نے مزید کہا کہ “یہ ایک بہت بڑی دنیا ہے، آپ کو معلوم ہی نہیں ہوتا کہ وہ کہاں ٹیسٹ کر رہے ہیں۔ وہ زمین کے نیچے تجربات کرتے ہیں جہاں کوئی نہیں جانتا کہ کیا ہو رہا ہے، بس زمین ہلتی ہوئی محسوس ہوتی ہے۔”

ٹرمپ نے واضح کیا کہ اب امریکہ کو بھی اپنے جوہری تجربات دوبارہ شروع کرنا ہوں گے تاکہ دیگر ممالک کے برابر رہا جاسکے۔

یاد رہے کہ گزشتہ ہفتے صدر ٹرمپ نے امریکی فوج کو فوری طور پر جوہری ہتھیاروں کی ٹیسٹنگ کی تیاری کرنے کا حکم دیا تھا۔
سوشل میڈیا پر جاری اپنے پیغام میں انہوں نے کہا تھا کہ انہوں نے محکمۂ دفاع کو ہدایت دے دی ہے کہ ایٹمی تجربات کا عمل فوری طور پر شروع کیا جائے، کیونکہ امریکہ کو ان ممالک کی طرح مضبوط ہونا چاہیے جو یہ پروگرام جاری رکھے ہوئے ہیں۔