مشرق وسطیٰ میں کشیدگی: توانائی اور خوراک مزید مہنگی ہونے کا خدشہ ہے، عالمی بینک

عالمی بینک نے خبردار کیا ہے کہ مشرقِ وسطیٰ میں جاری بڑھتی ہوئی کشیدگی کے باعث عالمی سطح پر توانائی کی فراہمی شدید متاثر ہو سکتی ہے، جس سے خوراک سمیت مختلف ضروری اجناس کی قیمتوں میں ہوشربا اضافے کا خدشہ ہے، جبکہ دوسری جانب مالی سال 2026-27 کے دوران پاکستان میں کپاس کی پیداوار میں 6 فیصد تک کمی کی پیش گوئی بھی کی گئی ہے۔

عالمی بینک کی جانب سے اجناس کی قیمتوں سے متعلق جاری کردہ تازہ ترین رپورٹ ‘کموڈیٹی آؤٹ لک’ کے مطابق سال 2026 کے دوران عالمی سطح پر اجناس کی قیمتوں میں مجموعی طور پر 23 فیصد اضافے کا قوی امکان ہے۔ رپورٹ میں واضح کیا گیا ہے کہ توانائی اور خوراک کی یہ بڑھتی ہوئی قیمتیں دنیا بھر میں مہنگائی کی ایک نئی لہر کا سبب بن سکتی ہیں۔ عالمی بینک کی رپورٹ کے مطابق، 2026 میں عالمی سطح پر توانائی کی قیمتیں مجموعی طور پر 32 فیصد تک بڑھ سکتی ہیں، جب کہ برینٹ خام تیل کی اوسط قیمت 91 ڈالر فی بیرل تک رہنے کا تخمینہ لگایا گیا ہے۔ اسی طرح، عالمی منڈیوں میں خوراک کی قیمتوں میں بھی سال کے دوران 10 فیصد اضافے کی توقع ظاہر کی گئی ہے۔

رپورٹ کے ایک اور اہم حصے میں پاکستان کے حوالے سے انکشاف کیا گیا ہے کہ مالی سال 2026-27 کے دوران ملک میں کپاس کی پیداوار میں 6 فیصد کمی واقع ہو سکتی ہے، جب کہ عالمی سطح پر بھی مجموعی طور پر کپاس کی پیداوار 3 فیصد کم ہونے کا امکان ہے۔ دنیا کے دیگر بڑے کپاس پیدا کرنے والے ممالک میں چین کی پیداوار 6 فیصد اور امریکہ کی پیداوار 3 فیصد گھٹنے کی توقع ہے، اس کے برعکس برازیل اور بھارت میں کپاس کی پیداوار میں ایک ایک فیصد اضافے کی نوید سنائی گئی ہے۔ عالمی بینک کی اس رپورٹ میں یہ خوش آئند پیش گوئی بھی کی گئی ہے کہ سال 2027 کے دوران عالمی اجناس کی قیمتوں میں 7 فیصد کمی آ سکتی ہے اور برینٹ خام تیل کی اوسط قیمت کم ہوکر 79 ڈالر فی بیرل تک آنے کا امکان ہے، تاہم اس تمام تر کمی کے باوجود 2027 میں بھی عالمی سطح پر خوراک کی قیمتوں میں مزید 7 فیصد اضافے کا خطرہ بدستور برقرار رہے گا۔ رپورٹ میں مزید بتایا گیا ہے کہ مشرقِ وسطیٰ کے علاوہ روس اور یوکرین کے درمیان جاری تنازع کے باعث بحیرۂ اسود کے اہم راستے سے زرعی اجناس کی ترسیل بھی متاثر ہوئی ہے، جب کہ موسمیاتی تبدیلیوں اور ‘ال نینو’ کے ممکنہ منفی اثرات نے بھی زرعی پیداوار کو شدید خطرات سے دوچار کر رکھا ہے۔