شمالی وزیرستان میں فورسز کے آپریشنز، 16 خوارج ہلاک، حوالدار اور نائیک شہید

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے مختلف علاقوں میں انٹیلی جنس بیسڈ آپریشنز کے دوران دو افغان باشندوں سمیت 16 خوارج کو ہلاک کر کے بھاری مقدار میں اسلحہ اور گولہ بارود برآمد کر لیا، جبکہ شدید فائرنگ کے تبادلے میں دو جوانوں نے جامِ شہادت نوش کیا۔ آئی ایس پی آر کے اعلامیے میں بتایا گیا ہے کہ علی خیل میں کی گئی کارروائی کے دوران دو افغان باشندوں سمیت 12 خوارج جبکہ میر علی اور دتہ خیل میں دو، دو خوارج مارے گئے، تاہم دہشت گردوں سے مقابلے کے دوران صوابی سے تعلق رکھنے والے حوالدار عصمت علی اور مردان سے تعلق رکھنے والے نائیک آفتاب علی شہید ہو گئے، جبکہ علاقے میں باقی ماندہ خوارج کے خاتمے کے لیے کلیئرنس آپریشنز جاری ہیں۔ دوسری جانب صدرِ مملکت آصف علی زرداری اور وزیراعظم شہباز شریف نے کامیاب کارروائیوں پر سیکیورٹی فورسز کو زبردست خراجِ تحسین اور شہداء کی قربانیوں کو سلام پیش کرتے ہوئے اس عزم کا اعادہ کیا ہے کہ ’عزمِ استحکام‘ کے وژن کے تحت غیر ملکی سرپرستی میں ہونے والی دہشت گردی کے مکمل خاتمے تک پوری قوم سیکیورٹی فورسز کے شانہ بشانہ کھڑی رہے گی۔