گورنر خیبرپختونخوا کا صوبے میں سونے کی کان کنی کی تمام سرگرمیاں فوری معطل کرنے کا اعلان

گورنر خیبرپختونخوا فیصل کریم کنڈی نے صوبے بھر میں سونے کی کان کنی کی تمام سرگرمیاں فوری طور پر معطل کرنے اور تمام مائننگ لیز منسوخ کرنے کا بڑا اعلان کرتے ہوئے لیز ہولڈرز اور ٹھیکیداروں کو ایک ہفتے کے اندر متعلقہ علاقوں سے اپنی بھاری مشینری ہٹانے کی ڈیڈ لائن دے دی ہے۔ پشاور میں پریس کانفرنس کرتے ہوئے گورنر خیبرپختونخوا نے انکشاف کیا کہ کوہاٹ سمیت مختلف علاقوں میں غیر قانونی گولڈ مائننگ میں ہزاروں ٹریکٹرز، ایکسکیویٹرز اور ہیوی ڈمپرز استعمال کر کے ماہانہ درجنوں کلوگرام سونا نکالا جا رہا تھا، جبکہ اس غیر قانونی کاروبار سے حاصل ہونے والی آمدنی کا 80 فیصد حصہ افغانستان منتقل ہو کر پاکستان کے خلاف دہشت گردی میں استعمال ہو رہا تھا اور مائننگ مافیا تحفظ کے بدلے فتنہ الخوارج کے کمانڈروں کو لاکھوں روپے بھتہ ادا کرتا تھا۔ انہوں نے الزام عائد کیا کہ اس غیر قانونی کان کنی میں پی ٹی آئی اور جے یو آئی کے بعض رہنماؤں سمیت 12 سیاست دان ملوث ہیں جن کے خلاف زیرو ٹالرنس پالیسی کے تحت سخت کارروائی کی جائے گی، جبکہ ڈیڈ لائن گزرنے کے بعد مشینری ضبط کر کے قانونی جرمانے عائد کیے جائیں گے اور ماضی میں کم جرمانے عائد کرنے والے افسران کے خلاف بھی تحقیقات ہوں گی۔ فیصل کریم کنڈی کا مزید کہنا تھا کہ کوہاٹ میں غیر قانونی مائننگ کے خلاف کامیاب آپریشن سے واپسی پر فتنہ الخوارج کے حملے میں ایک ڈی ایس پی اور 10 پولیس اہلکار شہید ہوئے، تاہم پولیس کی جوابی کارروائی میں 11 خوارج ہلاک کر دیے گئے اور معدنی وسائل کی غیر قانونی ترسیل روکنے کے لیے نگرانی مزید سخت کی جا رہی ہے۔