بچیوں کو مفت اور معیاری تعلیم دینا ریاست کی ذمہ داری ہے: حافظ نعیم الرحمان

امیرِ جماعتِ اسلامی پاکستان حافظ نعیم الرحمان نے کہا ہے کہ بچوں کو مفت اور معیاری تعلیم فراہم کرنا ریاست کی بنیادی ذمہ داری ہے، تاہم پنجاب میں اس وقت 80 لاکھ بچیاں اسکول نہیں جا رہیں اور صوبائی حکومت کا نظام بچیوں کو تعلیم کی سہولت فراہم کرنے میں ناکام دکھائی دیتا ہے۔ پاک انٹرنیشنل بزنس فورم کے زیرِ اہتمام ’’ہمارا ہنر، ہماری پہچان‘‘ کے عنوان سے منعقدہ خدیجۃ الکبریٰ نمائش سے خطاب کرتے ہوئے حافظ نعیم الرحمان نے کہا کہ معاشرے میں خواتین کے حوالے سے پائے جانے والے تحفظات کا حل عدل و انصاف کے قیام میں مضمر ہے، اور موجودہ معاشی بدحالی و مہنگائی میں جب مڈل کلاس پس رہی ہے تو خواتین کا برسرِ روزگار ہونا گھریلو معیشت کے لیے ناگزیر ہو چکا ہے۔ انہوں نے پنجاب حکومت کی تعلیمی پالیسیوں پر تنقید کرتے ہوئے مؤقف اختیار کیا کہ 15 ہزار سرکاری اسکولوں کو آؤٹ سورس کر دیا گیا ہے جبکہ نجی اسکولوں میں بھاری فیسوں کے باعث تعلیم کا دہرا معیار قائم ہے، اور مزید الزام عائد کیا کہ وزیراعلیٰ پنجاب مریم نواز عوامی پیسوں سے خریدے گئے طیارے پر اپنی بیٹی کی گریجویشن تقریب میں شریک ہوئیں۔ حافظ نعیم الرحمان کا مزید کہنا تھا کہ دنیا بھر میں طبقاتی تفریق بڑھ رہی ہے، تاہم اسلامی تعلیمات کے مطابق بچیوں کی پیدائش، بہترین تعلیم اور تربیت جنت میں جانے کا راستہ ہے۔