غیر ملکی شہریوں سے آن لائن فراڈ اور اے آئی کے ذریعے بلیک میلنگ کرنے والے دو کال سینٹرز پر چھاپے، خواتین سمیت 154 ملزمان گرفتار

نیشنل سائبر کرائم انویسٹی گیشن ایجنسی (این سی سی آئی اے) نے اسلام آباد اور راولپنڈی میں غیر قانونی کال سینٹرز کے خلاف بڑی کارروائیاں کرتے ہوئے خواتین سمیت مجموعی طور پر 154 ملزمان کو گرفتار کر لیا ہے۔ اسلام آباد میں پریس کانفرنس کرتے ہوئے ایڈیشنل ڈائریکٹر این سی سی آئی اے محمد شعیب خان نے بتایا کہ گزشتہ تین دنوں کے دوران دو کال سینٹرز پر چھاپے مارے گئے، جن میں اسلام آباد کے ایک چار منزلہ کال سینٹر سے 143 جبکہ راولپنڈی کے کال سینٹر سے 11 افراد کو حراست میں لیا گیا، جو ایشیائی و جنوبی ایشیائی ممالک کے شہریوں سے بڑے پیمانے پر آن لائن فراڈ اور اسکام میں ملوث تھے۔ انہوں نے انکشاف کیا کہ اسلام آباد کا نیٹ ورک چار مختلف مراحل میں کام کرتا تھا، جہاں پہلے مرحلے میں متاثرین کے موبائل فونز میں مخصوص ایپلی کیشن ڈاؤن لوڈ کروا کر ان کی موبائل گیلری اور حساس ڈیٹا تک رسائی حاصل کی جاتی اور انہیں معمولی رقم بطور قرض دی جاتی تھی، جس کے بعد دوسرے مرحلے میں مصنوعی ذہانت (اے آئی) کی مدد سے متاثرین کی تصاویر اور ویڈیوز کو فحش مواد میں تبدیل کر کے انہیں بدنامی کے خوف سے بلیک میل کر کے بھاری رقوم بٹوری جاتی تھیں۔ ایڈیشنل ڈائریکٹر کا مزید کہنا تھا کہ راولپنڈی کے کال سینٹر میں جعلی پولیس اسٹیشنز تک بنا رکھے تھے جبکہ آن لائن جوا ایپس کے ذریعے بھی ابتدائی منافع کا لالچ دے کر شہریوں کی مالی استطاعت کا اندازہ لگانے کے بعد انہیں لوٹا جاتا ہے، تاہم آن لائن جوا کھیلنے اور ایپس چلانے والوں کے خلاف بھی گھیرا تنگ کیا جا رہا ہے اور عوام کو ان فراڈ کال سینٹرز کے طریقہ واردات سے آگاہ کرنا انتہائی ضروری ہے۔