امریکن پاکستانی پبلک افیئرز کمیٹی (اے پی پیک) کا پہلا ’پاکستانی امریکن آرٹسٹس کنونشن‘

امریکن پاکستانی پبلک افیئرز کمیٹی (اے پی پیک) کے زیرِ اہتمام پہلا پاکستانی امریکن آرٹسٹس کنونشن آج نیویارک کے علاقے بروکلین میں ہوگا۔ ٹی وی ون یو ایس اے کنونشن کا میڈیا پارٹنر ہے اور تقریب کی کوریج کرے گا۔ کنونشن رولن اسٹوڈیوز میں دوپہر 12 بجے سے رات 8 بجے تک جاری رہے گا۔

اے پی پیک کا یہ کنونشن اپنی نوعیت کا پہلا ایونٹ ہے۔ اس کی خاص بات یہ ہے کہ یہ نوجوان پاکستانی اور پاکستانی نژاد امریکی فنکاروں کو ایک پلیٹ فارم پر لا رہا ہے، جن کا کام آج کی شہری ثقافت کی عکاسی کرتا ہے۔ فلم، ٹیلی وژن، موسیقی، فیشن، اینی میشن اور بصری فنون سے تعلق رکھنے والے ان فنکاروں کو ایک ہی تقریب میں اپنا کام پیش کرنے، ایک دوسرے سے ملنے اور سامعین سے براہِ راست گفتگو کا موقع ملے گا۔

اے پی پیک کے چیئرمین ڈاکٹر اعجاز احمد، صدر ڈاکٹر پرویز اقبال اور اے پی پیک یوتھ ونگ کے علی پرویز ملک کنونشن کے انتظامات میں سرگرم ہیں اور اس پہلے ایڈیشن کے لیے پُرجوش ہیں۔

ٹی وی ون یو ایس اے سے گفتگو کرتے ہوئے علی پرویز ملک نے بتایا کہ ٹکٹوں کی فروخت پر غیر معمولی ردِعمل ملا اور نوجوانوں نے خاص طور پر بھرپور دلچسپی دکھائی۔ ان کا کہنا تھا کہ وہ آج کی تقریب کے حوالے سے بہت پُرامید ہیں۔

پروگرام میں فن پاروں کی نمائش، فنکاروں کے ساتھ پینل مباحثے اور تین مختصر فلموں کی اسکریننگ شامل ہے۔ کنونشن کا اختتام لاہور سے تعلق رکھنے والی گلوکارہ نتاشا نورانی کی لائیو پرفارمنس سے ہوگا۔