ملک میں ہفتہ وار مہنگائی میں دوبارہ اضافہ، ٹماٹر کی قیمتیں سب سے زیادہ بڑھیں

اسلام آباد: ملک میں ہفتہ وار مہنگائی میں ایک بار پھر اضافہ ریکارڈ کیا گیا، جس کے نتیجے میں مجموعی سالانہ شرح مہنگائی 3.53 فیصد تک پہنچ گئی۔

وفاقی ادارہ شماریات کی جاری کردہ رپورٹ کے مطابق اس ہفتے مہنگائی میں 0.07 فیصد اضافہ ہوا۔ رپورٹ میں بتایا گیا ہے کہ اس دوران 16 اشیائے ضروریہ کی قیمتوں میں اضافہ، 13 میں کمی اور 22 میں استحکام رہا۔

اس ہفتے ٹماٹر کی قیمت میں سب سے زیادہ 57.03 فیصد اضافہ ہوا، جبکہ لہسن 2.61 اور چینی 2.23 فیصد مہنگی ہوئی۔ کیلے اور چائے کی قیمتیں بالترتیب 0.72 اور 0.59 فیصد بڑھیں۔ اس کے علاوہ ڈیزل، بیف، کوکنگ آئل، ایل پی جی اور جلانے والی لکڑی کی قیمتوں میں بھی اضافہ ریکارڈ کیا گیا۔

دوسری جانب پیاز 12.38 اور چکن 8.07 فیصد سستا ہوا۔ آلو، آٹا، انڈے، دال مونگ اور دال چنا کی قیمتوں میں بھی کمی دیکھی گئی۔