اے آئی نے امریکا میں نقل کا بحران سنگین کر دیا، 95 فیصد طلبہ اسائنمنٹ چیٹ بوٹ سے لکھوانے لگے

امریکی تعلیمی اداروں اور عالمی تحقیقی حلقوں میں آرٹیفیشل انٹیلی جنس (AI) کے بڑھتے ہوئے غیر متوازن استعمال پر شدید تشویش کی لہر دوڑ گئی ہے۔ جدید میڈیا رپورٹس کے مطابق امریکہ میں تقریباً 95 فیصد طلبہ اپنے تعلیمی ہوم ورک اور اسائنمنٹس AI چیٹ بوٹس سے مکمل کروا رہے ہیں، جس کی وجہ سے اساتذہ سخت پریشانی کا شکار ہیں۔ ماہرینِ تعلیم کا کہنا ہے کہ اس رحجان کے باعث طلبہ حقیقی علمی صلاحیتیں اور تحریری مہارتیں سیکھنے کے بجائے صرف “سیکھنے کی خوش فہمی” کا شکار ہو رہے ہیں۔

اساتذہ کے لیے صورتِ حال مزید چیلنجنگ اس وقت بن گئی جب جدید “ہیومنائزنگ” (Humanizing) اے آئی ٹولز سامنے آ گئے، جو بوٹ کی تحریر کو اتنی صفائی اور فطری انداز میں بدل دیتے ہیں کہ اساتذہ کے لیے AI سے لکھی گئی تحریر کو پکڑنا ناممکن حد تک مشکل ہو گیا ہے۔ ریسرچرز کے مطابق اساتذہ اور تعلیمی ادارے “ڈیٹیکٹرز بمقابلہ ایویڈرز” (Detectors vs Evaders) کی اس تکنیکی جنگ میں عملاً ناکام ہو چکے ہیں۔

دوسری جانب، یونیورسٹی آف کوپن ہیگن کے ڈیپارٹمنٹ آف کمپیوٹر سائنس کی ایک تازہ تحقیق میں خبردار کیا گیا ہے کہ مسلسل AI پر انحصار انسانی ساخت، تنقیدی سوچ اور علم کو دبا رہا ہے جس کا حتمی نتیجہ شدید کم عقلی کی صورت میں نکل سکتا ہے۔ 27 مختلف لارج لینگوئج ماڈلز (LLMs) کا جائزہ لینے کے بعد محققین نے دریافت کیا کہ بہترین AI چیٹ بوٹس کی معلومات میں روایتی گوگل سرچ انجن کے مقابلے میں 19 فیصد کم تنوع (Diversity) ہوتا ہے۔ یعنی چیٹ بوٹس گھسے پٹے اور ایک جیسے خیالات فراہم کرتے ہیں، جس سے انسانی ذہن میں نئے اور تخلیقی خیالات کا احاطہ کرنے کی صلاحیت محدود ہوتی جا رہی ہے۔